عدى النهار

بسم الله الرحمن الرحيم

البوست ده انا هخصصه لكلمات اغنيه قديمه كتب كلماتها عبدالرحمن الابنودى وغناها عبد الحليم حافظ
انا حاسس ان الابنودى لما كتب الاغنيه دى كان عارف انها تنفع للوقت اللى احنا عايشيين فيه كمان
مش عصر عبد الناصر بس

عدّى النهار .. و المغربية جايّة تتخفّى ورا ضهر الشجر و عشان نتوه في السكة شالِت من ليالينا القمر و بلدنا ع الترعة بتغسل شعرها جانا نهار مقدرش يدفع مهرها يا هل ترى الليل الحزين أبو النجوم الدبلانين أبو الغناوي المجروحين يقدر ينسّيها الصباح أبو شمس بترش الحنين؟ أبداً .. بلدنا ليل نهار بتحب موّال النهار لما يعدّي في الدروب و يغنّي قدّام كل دار و الليل يلف ورا السواقي زي ما يلف الزمان .. و على النغم تحلم بلدنا بالسنابل و الكيزان تحلم ببكرة .. و اللي هيجيبه معاه تنده عليه في الضلمة و بتسمع نداه تصحاله من قبل الأدان تروح تقابله في الغيطان فى المتاجر..فى المصانع..فى المدارس..فى السحات طالعة له صحبة .. تكون جنود طالعة له رجال .. أطفال .. بنات كل الدروب واخدة بلدنا للنهار و احنا بلدنا ليل نهار بتحب موال النهار لما يعدي في الدروب و يغني قدّام كل دار يا سلام ياعم الأبنودى ايه الكلام الجامد ده .احنا معاك وبنحلم ببكره واللى هيجيبه معاه وهننده عليه واياك يسمع ندانا وانا مستنى فرنسا هانم بكره يجبهالنا وشكرا وعلى رأى شعبولا بس خلاص

مبروك لكل العرب

بسم الله الرحمن الرحيم

المنتخب الوطنى المصرى فرح كل العرب انا شخصيا سعادتى اكتملت وفرحتى بلغت ذروتها
عندما شاهدت العرب فى كل مكان سعداء معانا بالبطوله والحقيقه شاهدت الشعب المغربى والتونسى
برغم ان فرقهم لم توفق فى البطوله الا انهم كانوا سعداء بالبطوله مثلنا .شاهدت انفعلاتهم اثناء الهجمات
واثناء الهدف كأن فرقهم هى التى تلعب .
انا الحقيقه اصريت انى اوضح مشاعر اخوانا العرب لينا لاننا عندما نتضامن مع شعب مثل الشعب الفلسطينى
يخرج علينا من يقول انهم لا يحبونا كما نحبهم. ومشاعرهم وضحت انهم معنا فى فرحنا وحزننا



اما عن الفرحه المفرطه للشعب المصرى بالفوز بالبطوله .اراها طبيعيه لأن الشعب محبط لا يوجد ما يفرحه
فإستغل الشعب الفرصه وفرح بكل ما يملك من فرحه واظن ان الشعب المطحون كان فى بال اللاعبين عندما كانوا
يلعبوا بإسم منتخب بلدهم كانوا مصريين على الفوز من أجل الشعب الغلبان

بصراحه من بعد المباراه الاولى كنت واثق من الفوز بالبطوله.الا قبل المباراه النهائيه عندما شاهدت التعصب
يعود الينا من جديد.جماهير الذمالك يمدحون فى عمروذكى ويذمون فى عماد متعب وجماهير الأهلى ترد عليهم
بأن متعب لاعب خططى وان لم يحرز فله دوره.عندما رأيت هذا التعصب انتابنى الخوف بأن البطوله من الممكن
ان تضيع من ايدينا ولكن الله اكرمنا بالبطوله لأننا محتاجين لها معناويا.الحمد لله بهذا النصر الكبير لمصر

شكرا لكل من فرح لفرحنا .شكرا لكل من صنع لنا فرحتنا.شكرا لكل من شجع منتخب بلده دون تعصب

يا مصر يا حبى يا حته من قلبى.يامصر يا حبى ياحته من قلبى
خلاص انا خلصت.......ومليون مليون مبرووووووووك

بسم الله الرحمن الرحيم

التاج ده وصلنى من يورو
وانا بصراحه حابب اجاوب عليه
وكمان حابب اجاوب على تاج
الصباغ

تاج يورو

دخلت مجلس الشعب من اوسع ابوابه....فما هو رمزك الانتخابى؟؟

علم مصر
هل تفضل الدخول مستقل او تبع حزب معين؟؟

مستقل
دخلت مستقل هل توافق على الانضمام للحزب الوطنى؟؟

لا طبعا
ازاى بعد اما الناس اختارتنى كمستقل انضم للحزب الوطنى
انا بعتبر ده خيانه للناخبين اللى انتخابونى
اول حاجه ناوى تعملها لنفسك ولاسرتك؟؟

مش لاقى حاجه اكتبها
ايه المشروع اللى ناوى تعمله لأهل ديرتك ..دون ذكر اسم الدائره؟

اقامة مراكز شباب لممارسة الرياضه فى كل مكان يحتاج
لمركز شباب وتفعيل دور المركز لدوره اثقافى
قعدت فى المجلس جنب نائب مميز فمن هو؟؟

النائب \ الدكتور جمال زهران
قدمت سؤال للحكومه ما هو؟؟

فين فلوسنا
طلب احاطه موضوعه ايه؟ وبتقدمه لمين؟

عن الاحتكار..
اقدمه لرئيس الوزراء
استجواب لإثنين من الوزراء موضوعه ايه وبتستجوب مين؟

اول استجواب..لوزير الداخليه
موضوعه..ازاى الأمن اتحول من مسؤل لحماية الناس الى ارهاب الناس
ثانى استجواب..لوزير التعليم
مستوى التعليم فى الحضيض..وبعدين احنا محتاجين تطوير التعليم الفنى
لان ده هو اللى فعلا هيؤدى الى تقدمنا
هل انت مع الخصخصه؟؟

انا مع الخصخصه الصحيحه
ويكون القطاع الخاص بيتماشى مع القطاع العام
هل انت مع قطع العلاقات مع اسرائيل؟

ايوه طبعا مع قطع العلاقات مع اسرائيل
هل تؤيد الحرب على العراق؟؟

لا اوافق
هل تؤيد مرور الأمريكان من قناة السويس؟؟

اوافق على مرور العالم كله من قناة السويس ولكنى لا اوافق على مرور اى جيوش
تمر لتضرب اى شعب

تحب تمرر التاج ده لمين؟؟
الاول همرره لمحمد
صاحب مدونة اضراب
ولكل من لم يجاوب على التاج ويحب ان يجاوبه

تاج الصباغ

هل توافق على حذف خانة الديانه من البطاقه الشخصيه؟

لا طبعا لان التمييز بين المسلم وغير المسلم مهم فى بعض المعاملات والعقود مثل الزواج
ولكنى لا اوافق على التمييز فى المعامله بين المسلم وغير المسلم لان ذلك منافى لتعليم ديننا
الحنيف
هل تعتقد بوجود إضطهاد للمسيحيين فى مصر؟؟

طبعالا.. المصريين كلهم مضطهدين على السواء من النظام
من هو الشخص الذى تختاره لرئاسة مصر؟؟

اى شخص ينجح فى انتخابات حره
اذا قمت بتأسيس حزب سياسى..فمن هم الاشخاص الذى ستقوم يضمهم؟؟

اصحاب المدونات اللى بجد شايفهم مخلصين وبيحبوا مصر
هل توافق على مشاركة كل من الاخوان والمسيحيين فى حكم مصر؟؟

ليه لا..زى ما قلت اى شخص ينجح فى الانتخابات الحره من حقه يدخل فى الحكومه
لكن الرئيس انا بأعترض على ان يحكم مصر شخص غير مسلم لان ده مخالف للشرع
هل تعتقد ان توريث الحكم سيتم فعلا فى مصر؟؟

انا شايف ان الوضع رايح بينا لسكة التوريث لكن ان شاء الله مش هيحصل
فى رأيك الشخصى ما هو افضل انجاز لحسنى مبارك؟؟

مترو الانفاق..
وما هو اسوأعمل قام به؟؟

كتير..بس الجامد اوى ما حدث للقضاه الشرفاء
فى رأيك الشخصى ..ما هى افضل مدونه على بلوجر قمت بزيارتها؟؟

كتير..بس بجد مدونة (عايزه اتجوز)جامده جدا
ايهما تفضل كزوجه المرأه العامله ام المرأه المتفرغه؟؟

المرأه المتفرغه
اذا تزوجت وانجبت ولدين وبنتين فأى الاسماء ستختار لهما؟.؟

البنات..ملك ومنة الله
الاولاد..محمد وعبد الرحمن
تحب تمرر التاج ده لمين؟؟

لاضراب.. ولكل من يحب ان يجاوب على التاجين

اخيرا خلصت
انا حاسس انى قلت
كلمة حق

غزه تستغيث

غزه تستغيث

بسم الله الرحمن الرحيم

ها هو العدو الصهيونى يحاصر غزه من جديد .نقص فى الغذاء .نقص فى الدواء .تقطع الكهرباء.حصار كامل .اخواننا فى غزه يموتون ونحن نعيش حياتنا وكأن شئ لم يكن.هل نحن مسلمون كما ارادنا الله .هل نناصر اخواننا ونشعر بأوجاعهم

هل نحن اقل شأنا من الكفار عندما اخترقو حصار امثلاهم من الكفار عندما حاصروا الرسول واصحابه فى شعب ابى طالب وقالوا ("أنأكل ونشرب ونفر من اهلنا يموتوا جوعا فى الجبال) هل نحن عاجزون على ان نفعل مثلهم الم يقرأ زعمائنا سيرة رسولنا وعرفوا هذا الموقف
بماذا سيرودون على الله عند السؤال

اللهم انت اغنى واقوى من الجميع فكن لهم معينا
اللهم يامجيب الدعاء اقبل تضرعنا وانصر اخواننا
اللهم انا نشهد انهم شعب صابر عى البلاء فكن لهم يارب

كنت قد شاهدت فى قناة الجزيره الاخباريه تقرير عن الحصار وقد المنى ما رأيت .ما هذا الذى رأيت
رأيت فتاة فى سن الرابعة عشر من عمرها تنتظر الموت وذلك لان الدواء غير موجود
رأيت غزه كاملة بدون كهرباء.رأيت محطات البنزين خاويه
رأيت طفل فى غرفة العنايه المركزه يكاد يموت لانه كان على جهاز التنفس الصناعى ولما قطعت الكهرباء توقف الجهاز
اللهم ارحمنا يارب ولا تملك فينا عدو

بصراحه انا كتبت البوست ده دون الترتيب للافكار او غيره لكنى كتبت ما كنت اشعر به من مراره وحزن على اخواننا
شكرا لجميع من يتابع .....السلام عليكم

ظهور الدجال

اعلنت اذاعه محليه عراقيه عن ظهور المسيح الدجال وتناقلت وسائل الإعلام هذا الخبر بمواقف متباينه.منهم المصدق للخبر ومنهم المكذب له

وقد اثار هذا الخبر الذعر والرعب فى نفوس الشعوب المختلفه وبدأت الاستعدادات بالفعل لمواجهة الدجال حيث هاجر بعض المسلمين الى مكه والمدينه تفاديا لفتنته لان الدجال ممنوع من دخول مكه والمدينه ....

وقد وصف رسول الله (صلى الله عليه وسلم) فتنة الدجال بانها اعظم الفتن وتبنت وسائل اعلام مختلفه فكرة تكذيب الخبر منهم من كذب ظهوره الان ومنهم من يكذب ظهوره على الاطلاق اى انه لن يظهر وبين هذا التباين فى مواقف وسائل الاعلام نجد انفسنا حائرين هل نصدق من اكدوا ظهوره ام نصدق من كذب الخبر

اصدقائى لاتنزعجوا هذا الخبر من تأليفى ولكنى اقصد به ان انبهكم ان الدجال وان كان لم يظهرفإن ظهوره اكيد وقريب
فقد كان الرسول (صلى الله عليه وسلم )يستعيذ بالله من فتنة الدجال
ومن دعاء الرسول(صلى الله عليه وسلم)
اللهم انى اعوذ بك من شرفتنة المحيا ومن شر فتنة الممات ومن شر فتنة المسيح الدجال


وقد اخبرنا رسولنا الكريم عن ظهورالمهدى المنتظر قبل ظهور المسيح الدجال ولكن تبادر الى ذهنى سؤال
هل اذا ظهر المهدى وانا على قيد الحياه سأكون من التابعين والمصدقين له؟
ام سأكون من المكذبين له ؟
وهذه المسأله مقترنه بمدى ايمانى بالله والعمل بكتابه وسنة رسوله(صلى الله عليه وسلم)..اللهم انى اعوذ بك من شر فتنة الدجال
واجعلنى من المصدقين للمهدى


وانا لم اذكر هذا الموضوع ليكون شغلنا الشاغل ولكن لنستعد له والاستعداد له يكون بالسير على نهج رسولنا الكريم والعمل على طاعة الله عز وجل فلنكمل اصلاح انفسنا بطاعة الله عز وجل
ولنكمل اصلاح انفسنا بأن نكون فعالين بمجتمعتنا

خلاص خلصت كلامى مستنى تعليقاتكم اللى اكيد بستفاد منها

ان الله لا يغير ما بقوم حتى يغيرو ما بأنفسهم

كلناعندنا احساس بالزهق والخنقه من كتر الفساد والكل بيرمى المسؤليه على غيره احنا الشعب بنقول الحكومه والريس..البلد بجد مليانه فساد بس عشان كده هنبطل نحبها؟ ولا هنهاجر ونشوفلنا بلد تانيه وناخد جنسيه؟ لا مش ده الحل ..الحل فينا احنا بايدينا احنا وموجود بالقرأن الكريم فى الايه الكريمه اللى بتقول(ان الله لا يغير ما بقوم حتى يغيرو ما بأنفسهم)يبقى اكيد ربنا مش هيبعتلنا التغيير واحنا لسه كده فى منتهى السلبيه ...
تعالو ننسى الحكومه شويه مش كتير..ونبدأ بنفسنا نشوف الصح فين ونعمله ونحاول نصلح نفسنا الاول وبعد كده ندور على اصلاح مجتمعنا لان الايه واضحه مش هينفع المجتمع ينصلح الا باصلاح انفسنا ...يعنى مثلا الموظف اللى مش بيمشى المصلحه الا بالرشوه او(الاكراميه)الموظف ده مش قريبك وقريبى ؟مننا يعنى..ولاضابط الشرطه اللى بيعذب الناس فى مراكز واقسام الشرطه ما هو اخوك ولا اخوكى ولا قريبك ولا قريبى مننا برده يلا هننسى الحكومه زى ما قلنا ونبدأ من جديد نعمل الصح ونطالب بحقوقنا منسبش حقنا مهما كان حق بسيط لان (لا يضيع حق ورأه مطالب)بس كلامى ده مش معناه ان الحكومه مش مسؤله لا ده مسؤله ونص كمان بس الصح نبدأ بأنفسنا الاول وبعد كده نقول هما مسؤليين

خلاص البوست خلص بس قبل ما امشى عايز اسمع رايكم وردودكم

التصنيف

• بسم الله الرحمن الرحيم

الحقيقه انا اصريت ان يكون موضوعى الاول بعد تبيين سبب عمل المدونه ومعنى الاسم انه يكون الموضوع ده ...التصنيف...انه يكون اول المواضيع حتى ابين انى احب مصر بدون اى مصلحه غير انى بحبها وعشان كمان ابين انى ما ليش تصنيف يعنى ولا تبع ده ولا تبع ده وانا اقصد

ان الناس فى هذا الزمن او فى هذا التوقيت لا يشغلهم الا تصنيف الناس هل ده سلفى ولا اخوان مسلمين ولا صوفى وغيرها من التيارات المختلفه او هل هو سنى ام شيعى وكأننا لا يوجد ما يشغل بالنا وفكرنا ...خلاص فلسطين حررت ..خلاص العراق حررت ..خلاص افغانستان حررت ..وما اكثر اراضيناالمغتصبه .. يعنى خلاص اخدنا حقوقنا الدستوريه يعنى خلاص بقينا احرار..المهم ان الكل واخد باله من ان اعدائنا من الامريكان والغرب واليهود هما اللى بيزرعوا بينا الفروق دى عشان كل فرقه تتعصب لفرقتها او جماعتها او مبادئها وبعد كده نكون صيد سهل ليهم بعد اما نكون متفرقين ومش مجتمعين...انا عارف ان الكلام ده مش هيعجب ناس كتير بس انا شايف واكيد الكل هيشوف زيى اننا لو اتجمعنا هنكون اقوى ..كفايه كده ويلا نتجمع على حب بلدنا ونخلص فى حبها