فضيحه اقتصاديه

بسم الله الرحمن الرحيم
السلام عليكم ورحمة الله وبركاته

اول شئ كل سنه وانتم طيبين بمناسبة عيد الفطر انا اخدت اجازة العيد وقولت فرصه اعوض اللى فاتنى
لفت نظرى احصائيه خاصه بالفضيحه الاقتصاديه المعروفه بإشهار بنك ليمان براذرز الامريكى افلاسه
انتو عارفين خسارة العرب فى الفضيحه دى كام ؟ خسارة العرب من وراء اشهار افلاس بنك ليمان راذرز
تبلغ مئتان واربعين مليار دولار يعنى بالارقام كده 240.000.000.000 شوفتوا الرقم اد ايه يخض
يصدم يعنى اثرياء العرب مش مكفيهم انهم سارقين شعوبهم ومصين دمه وبس لاء وكمان مش عارفين
يحافظوا على الفلوس دى بياخدوها يحطوها فى بنوك امريكيه واوربيه وادى النتيجه تخيلوا الفلوس دى
لو بتستثمر هنا فى المناطق العربيه طبعا مش مبلغ الخساره بس ولو انه مبلغ يحل مشاكل كبيره جدا
ده تقريبا ميزانية دول
على فكر ياجماعه الخبر ده انا قرأته فى الاهرام بتاع يوم الاحد مش فى جريده معارضه او جريده
من اللى بتحقد على الاغنياء مش عارف الواحد هيعيد ازاى مع خبر زى ده عالعموم كل سنه وانتم بالف
خيـــــــــــــــــــــــــــــــــــــر تحياتى للجميع

سهم فى الإيد انت مالك ومستفيد

بسم الله الرحمن الرحيم

السلام عليكم ورحمة الله وبركاته

بعتذر لكل المدونين اللى كنت بذورهم ولدوقتى مش مالك اذورهم لكن ان شاء الله هحاول فى اول اجازه
الحقيقه الأرض الجديده وخدانى جدا كل الفتره اللى فاتت بنحاول نخلى الأرض ونجهزها للزراعه وكمان
بنبنى بيت هناك وكمان بنعمل بير للمياه وكمان بنقدم على محول كهربا العمل يسير على قدم وساق زى
ما بيقولوا ومتشكر جدا ليكم على سؤالكم ودعاكم وتشجيعكم ليا وان شاء الله ربنا هيستجيب لدعائكم

نيجى بقه للاعلان بتاع سهم فى الايد انت مالك ومستفيد حد يكون خبره فى الاقتصاد يحللنا الاعلان ده
والغرض منه واشمعنا الاعلان ده ظهر دلوقتى بعد مشكلة هشام طلعت مصطفى هيه المشكله دى اثرت
فعلا انا ملاحظ كده ان مسلسل رجال الاعمال اللى بيدخلو السجن والله اعلم اذا كانو مذنبين فعلا او لا
المسلسل ده بوخ اوى حاسس ان ده مقصود عشان نفضل كده بندور على واحد سرقنا او بنتكلم على
واحد قاتل المهم نكون مشغوليين وخلاص بأى حاجه تانيه غير الاخ ابو عوكل صاحب ومالك العزبه
هو وولده عوكل طبعا الاسم ده مستعار من المدونه المعروفه appy المهم بقه حكاية سهم فى الايد دى
ايه المقصود منها هل زى ما عقلى البسيط صورلى ان الشركات الكبيره تكون مملكوه لأشخاص كتيره
ويكون صعب على شخص بيعينه التحكم فيها او التأثير فيها زى ما حصل ف قضية هشام طلعت مصطفى؟
ولا ايه عايز حد فاهم يفهمنى

وكل سنه وكلم بالف خير بمناسبة العيد عيد الفطر على الابواب
تقبل الله منا ومنكم

أخيرا اخدنا الأرض

بسم الله الرحمن الرحيم

السلام عليكم ورحمة الله وبركاته

كل عام وانتم بخير وربنا يعينكم على صوم رمضان ويجعلكم من المعتقوين من النارفى هذا الشهر الكريم
انا اسف لأنى بتأخر اوى كده فى كتابة البوستات بتاعتى واسف كمان على عدم متابعتى ليكم فى الفتره
الأخيره لكن انا عارف انكم هتعذورونى لأنى مشغول والله والسبب الأرض والحمد لله اخيرا تمكنا من
ايجاد الأرض الكويسه اللى ورقها سليم بقلنا تقريبا ثلاث شهور بندور على ارض معظم الاراضى اللى
اتفرجنا عليها وضع يد شوفتو اراضى بلدنا فين ؟ ياريت الاراضى دى مع شباب بتبدأ حياتها او مع اسره
على اد حالها وبتزرع الارض دى لكن للأسف معظم الاراضى دى مع ناس مش محتاجه ناس معها ملايين
ويمكن مليارات طيب نسيب النقطه دى انا مكنتش هعترض لو الاراضى دى كلها اللى وضع يد مستصلحه
ومزروعه لكن للأسف كل واحد من دول واضع يده على قطعة ارض وزارع عشر فدادين مثلا وسايب مية فدان
من غير زراعه ........دى النقط السلبيه انما اكيد فى نقط ايجابيه بس ممكن تلاقونى فى الأخر زعلان منها طيب ازاى
هقول انا شوفت مساحات مزروعه فى صحراء مصر من العامريه للخطاطبه لابوغالب للاسماعليه وطريق مصر
اسكندريه الصحراوى المساحات دى بيتهيقلى لو ليها تسويق مظبوط اعتقد ان مش هيكون فى جعان واحد فى مصر
اعتقد مش هنشوف اطفال الشوارع والاولاد اللى بينامو تحت الكبارى وفى عربيات المترو والقطارات لو فى ضمير
ودورو على اسواق لمنتجات المزارع اللى فى الصحراء اكيد الحال هيبقى غير الحال وعلى الاقل نرجع بلد زراعى
بدل ما احنا لا طولنا نبقى بلد صناعى ولا نفصل زى ما كنا بلد زراعى

النقطه اللى انا متفائل ليها اننا استلمنا الأرض فى اول يوم رمضان وان شاء الله تدعولينا ان ربنا يباركلنا فيها
كل عام وانتم بخير وافوتكم على خير وان شاء الله هحاول اعمل تحديث واحط صوره للأرض تحياتى للجميع